【依法辦事】踢門兼且襲車長 狂漢證實被拘捕

當地時間10月29號，加拿大卑詩省大溫哥華地區嘅一班運輸聯線嘅巴士上面發生襲擊案。

由巴士上乘客拍低同上載到社交媒體嘅影片見到，當時一名男子多次腳踢巴士車門，又向巴士車長吐口水――大溫哥華公共運輸警察證實同日接手調查呢一宗發生喺本拿比嘅襲擊案。

去到10月31號，本拿比皇家加拿大騎警知會大溫哥華公共運輸警察，施襲者因為一宗唔相關嘅案件，按《精神健康法案》被扣留。

本拿比皇家加拿大騎警指佢哋一名警員拘捕一名男子後，睇到社交媒體上嘅影片，證實係同一人。

大溫哥華公共運輸警察回應當地網媒查詢時表示，佢哋會繼續調查，並且會因應證據對施襲者加控罪名。

係呢~香港間中都有「人」襲擊公共交通從業員，但執法部門做過乜嘢呢？