九巴首部電動雙層巴士抵港

今日九巴就喺公司網頁發放咗新聞稿，指旗下第一部純電動雙層巴士運抵香港。抵港嘅係比亞迪 B12D 純電動雙層巴士，為之前抵港16部比亞迪 B12A 電動單層巴士嘅雙層版本。

巴士採用比亞迪最新嘅「刀片電池」技術（有關刀片電池介紹可以瀏覽「汽車台」影片︰https://youtu.be/iaJKStnlZII），可以大幅縮小電池整體體積。而巴士採用比亞迪嘅輪邊摩打系統，可以節省車尾「引擎倉」內擺放驅動系統嘅空間，騰出更多空位安放電池同冷氣組件。

雖然「刀片電池」有效節省空間同體積，但為咗令巴士能夠提供更長嘅續航距離，擺放更多電池亦佔用咗車廂尾部一個對排位置，令全車載客量比一般柴油巴士少，只有115人，但係續航距離就比本港現有嘅雙層電動巴士高，達到 300 公里。而因為遷就下層車尾移前咗嘅載客空間，太平門位置亦稍為移前至中軸及尾軸之間。

外觀上依然使用代表九巴電動巴士嘅「電光綠」色塗裝，左邊車身就裱上全新設計以曲線為主嘅「Heart rate of the city」城市脈搏字句，但右邊上層旁板就保留青綠色車身，未有貼上任何口號。

九巴指工程師團隊將會為新巴士進行一系列測試，喺通過運輸署車型檢定同出牌程序後就會投入服務。此外，因應車隊內電動巴士數目增加，九巴除咗積極為現有車廠增設充電設施外，亦都籌備喺屯門同大埔興建兩座供電動巴士停泊同充電嘅多層車廠，預計喺四至五年內落成，提供 850 個充電泊位。