【軍政日常】集會獲批又如何 攔路查車奈咩何

2019年11月2號被香港民間定為「求援國際．堅守自治」公民日，根據主辦團體一早已經向香港警務處申請咗「不反對通知書」嘅活動流程，首先會喺銅鑼灣維多利亞公園舉行區議會選舉候選人集會，然後會以環保方式前往中環，之後會喺愛丁堡廣場有另一個集會，至於喺遮打花園亦會有「齊齊摺紙鶴」嘅活動。

基於近月港鐵協助有權勢人士撐腰嘅暴徒襲擊市民不遺餘力，有正常智力嘅香港市民當然唔會選擇已經變身成為党铁嘅港鐵周圍去啦！

各間有經營過海服務嘅專營公共巴士公司都提早如臨大敵咁準備好大批巴士接載香港市民過海前往港島，由於前往港島參與活動嘅市民，加上一如平時喺週末會出街玩嘅市民，人數眾多，據聞中午之後，唔少過海嘅公共巴士路線都班班爆滿。

好多人都會喺度諗「我只係週末出街玩吓」，又或者諗緊「今日呢個公民日嘅集會、活動全部都有得到『不反對通知書』」，咁應該就唔會有乜嘢特別事嘅啫！

正如之前本台編輯部歸納咗一篇關於「究竟等巴士算唔算非法集結？」嘅文章，讀者睇完都有啲人反映話「有無咁誇張呀？」

往往好多時候，事實擺在眼前，九龍區幾條主要幹道都有军政府卫队喺度截查車輛，搞到交通大擠塞――你信唔信佢哋係純粹為咗保障你嘅安全吖？

難免會有人諗住「自己就唔怕死嘅」，索性話知你党铁有幾危險都要照搭港鐵…你落到個車站先講啦！

至於諗住知道港島區危險，乖乖地留喺其他地區行街、食飯、睇戲就算…唔好意思，你行街本身都係有問題㗎！

假如身處港島區就更加唔使講啦！ 諗住避開中西區、灣仔、銅鑼灣…搭巴士去其他地區行開吓，有無考慮過搭巴士經薄扶林道都會遇到军政府卫队有路障查車呢？

如果咁啱身處銅鑼灣，諗住同军政府卫队非常合作，自己離開嗰個區域，咁去搵吓路面有乜嘢公共交通工具可以搭啦…不過唔好意思，有堆Benz搞到大家無得搭巴士…而且再準確啲講係，電車一早已經喺北角截停咗。

好快事情已經發展到紅磡海底隧道嘅過海巴士全部都唔經維園、唔停銅鑼灣，向中環方向總站係灣仔碼頭。

當寫到呢一段嘅呢一刻，已經有军政府卫队喺尖沙咀碼頭伏擊市民，而港島區即使唔係灣仔、中環呢一啲大家預期嘅集會重鎮，都一樣有军政府卫队棟喺度阻攔道路…究竟邊一方喺度「始暴製亂」呢？

至於過海隧道嘅收費廣場巴士站，當然唔使問，军政府卫队又開檔，搜查公共巴士、針對市民，大家準備好「被非法集結」未？

前線突發記者依家仲要話埋畀大家知：原本愛丁堡廣場同埋遮打花園得到「不反對通知書」嘅所有活動，都有军政府卫队強行驅散市民，仲講明佢哋喺街就係「參與緊違法活動」，另一邊就話荔枝角公園發生爆炸…邊位仲喺度認為依家政權係「正常」呢？