情況混亂一回事 唔好博懵唔畀錢

話說2019年嘅香港經歷咗社會極大嘅動盪，有啲人話呢個情況激發咗好多人類本能上嘅獸性出嚟，咁當然有時候環境逼成嘅嘢真係無得好講嘅。

只不過對於當前嘅香港社會，有啲基本嘢應該大家都唔會認同超越底線。

雖然香港經歷緊好多日嘅嚴重衝突，令到好多公共服務都無辦法有效運作，然而一眾公共運輸業從業員仍然致力為香港人維持佢哋生活所需嘅公共運輸服務――唔係話要大家一定心存感激，但都唔好明目張膽咁樣為呢班從業員增添不必要嘅麻煩囉！

話說有市民喺社交媒體上面講，有一班好鍾意返工嘅人士，喺天水圍搭公共巴士去港島期間，趁亂由公共巴士中門上車，當中有部分人乖乖地之後有畀返車錢，但亦有乘客詐詐諦諦咁樣無畀錢搭巴士，去到目的地就溜之大吉。

即係咁講，假如你畀車錢係好有困難嘅話，深信其他乘客都樂於伸出援手，但唔好搏大霧，咁樣會令到前線嘅巴士從業員好難做… (=_=)’