東廊元旦朝大撞 新巴乘客多人傷

2020年1月1號朝早，正當香港人開始新一年嘅生活，喺11點幾就又傳嚟壞消息。

有網民喺社交媒體貼出相片，指喺大約11點多啲，東區走廊東行近和富中心發生車禍。

消息指現場最少涉及3架車，分別係1架的士、1架保時捷、1架雙層巴士。

其中涉事雙層巴士係新巴嘅Enviro500 MMC 12米（車隊編號5683，車輛登記TZ5369），當時行緊720號路線去嘉亨灣。

車禍發生後，巴士左邊車頭上車門位置損毀較為嚴重。

消防接報後，迅即調派救援人員到場拯救。

根據whatsapp巴士車長群組流傳嘅相片，車禍後現場佈滿碎片，巴士上多名乘客落車等候救援，有乘客要坐喺路面，而一批防暴警察亦到場處理乘客。

受車禍影響，東區走廊北角段來回都嚴重擠塞，市民請耐心忍讓。

至於今次車禍起因，網上流傳一段聲帶，指涉事巴士車長入錯咗東廊北角出口，而720號路線應該係去到鰂魚涌出口先至離開東廊，巴士車長急急抽返架巴士上東廊就出事。

當然，最終都需要有關方面詳細調查。