【防疫要緊】搭巴士都要防疫 口罩唔該戴好先

隨著新型冠狀病毒（武漢肺炎）疫情喺社會擴散得越嚟越嚴重，為保障公眾安全，適當佩戴口罩係一個基本公民責任，有巴士車長早前已經提出乘客戴好口罩先至上巴士…

當然，巴士公司總會話「無寫明話得你就唔做得」…aka唔係每間巴士公司都咁有社會責任…

望吓隔離埠，當有社區政策推動，自然人人都會顧己及人…

反觀香港，因為無正式提倡出門全部都要佩戴口罩，政府真係使鬼理社會上欠缺口罩，無口罩就由得大家，結果嘛~有病徵嘅市民就被逼唔情願咁病緊都要喺無防禦下搭巴士，大家自求多福乎？

當發展到可以預見「社區爆發」嘅時候，有巴士公司終於話呼籲戴口罩…

而其實呢~根據香港法例第230A章 《公共巴士服務規例》 ── 第10條「售票員的行為和沒有運載售票員的巴士的司機的行為」，入面就寫明：-

(2)任何巴士售票員以巴士售票員身分行事時，如該巴士沒有載有售票員，則司機 ——

…

(e)可拒絕准許其有合理因由相信是神智不清、精神不平衡或患有傳染病或接觸性傳染病的人登上或乘搭該巴士；

所以…如果各位見到疑似未有適當佩戴口罩又令大家覺得擔心可能會引致大家得到傳染病嘅乘客想上巴士嘅時候，記得提醒返巴士車長：「香港法律第230A章第10條賦予咗權力畀你拒絕佢上巴士㗎！」

當然啦…如果大家可以守望相助，見到有人真係撲唔到口罩而又有需要嘅話，自己力所能及咁分享多出嘅口罩就更好。