乘客發燒兼作嘔 巴士返廠消毒夠

根據社交媒體群組消息，2020年2月4號傍晚6點半左右，九巴一架行駛64K號路線嘅丹尼士三叉戟10.6米型雙層巴士，現場消息指巴士上有乘客睇見一名女乘客神色有異，問嗰名女乘客係咪身體不適。

嗰名女乘客回應指佢自己有發燒，但巴士上乘客見唔到嗰名女乘客有戴上口罩，而巴士車長得悉事件後，隨即喺太和帝欣苑巴士站停低，並報案要求救護員到場協助。

巴士停站後，一眾巴士乘客都離開巴士車廂。根據社交媒體群組消息，嗰名女乘客喺巴士站曾經表示有作嘔感覺，但未能證實有無嘔落巴士站。

事後嗰名女乘客被送院，其他巴士乘客改搭其他巴士離開。根據大埔區運頭塘區議員黃兆健所講，佢向九巴查詢後獲告知證實有相關事件，九巴已經即時將相關巴士揸返巴士廠作消毒清潔，避免散播病菌。至於嗰名女乘客嘅情況則有待進一步資料，未知大埔那打素醫院會否回應。