愉景灣渡輪又壞 居民巴士要乖乖

2020年9月9號，愉景灣交通突然發出乘客通告，原本取代由愉景灣來回中環渡輪服務嘅通宵居民巴士：路線編號DB08R，由2020年9月10號開始，將會喺平日加開2班晨早特別班次：0750、0805單向由愉景灣開往中環。

除咗已經知道實際耗時比渡輪耐之外，今次「居民巴士代替渡輪」喺開始提供晨早特別班次後――機械嘅嘢難免都會壞嘅――喺9月15號嘅DB08R晨早特別班次就係架巴士行行吓「扭計」喇！

當然，有時就同小朋友一樣，一個「曳」，另一個就有樣學樣：無錯，恭喜晒愉景灣嘅朋友！你哋嘅渡輪又壞呀！（＝＿＝）

2020年9月17號朝早7點，愉景灣交通突然發出告示，指因渡輪故障，由朝早7點開始，愉景灣渡輪只可以維持每30分鐘一班，建議去中環嘅乘客改搭巴士。

而…又…當然…點少得「DBAY217」（⊙_⊙）不過9月16號嗰程好乖出到中環嘅（＞＿＜）

畀啲信心！相信愉交！唔怕！