【香港電車】免費一週賀港隊奧運佳績？ 電車公司：係有咁諗但未確實

對於網上流傳 香港電車 「將」提供一週免費乘車，香港電車有限公司經公關公司表示有關講法有誤。

香港電車有限公司董事總經理敖思灝先生、市場商務及品牌總監張永恒先生喺記者會均向本台記者有以下表示（總括二人意見）：

香港電車喺張家朗奪得香港歷史上第二面奧運金牌後，見到旋即有其他公共交通機構向香港奧運代表隊送出免費乘車優惠，考慮到香港電車作為香港最廉價嘅公共交通工具，卻又局限喺香港島北岸，如果香港電車單純向香港奧運代表隊送出免費乘車優惠，「兩個六嘅車費優惠對比體育運動員嘅奮鬥毫不匹配」，認為對香港奧運代表隊「未夠尊重」。

香港電車作為伴隨香港成長已經117年嘅知名公共交通機構，每一個香港人都係譜寫香港成功故事嘅重要一員，香港奧運代表隊努力得嚟嘅成就鼓舞到每一個香港人，高興嘅事亦值得全民同賀。

香港電車曾經考慮為香港奧運代表隊舉行勝利巡遊，然而礙於現時嘅防疫、限聚等緊急政策，呢一類牽涉群組聚集嘅活動可能需要尋求政府特別批准，暫時未必可行。

香港電車穿梭香港島北岸，服務嘅乘客涵蓋藍領白領各階層，香港電車認為提供免費乘車優惠畀所有乘客，例如一日以至一週，既可與眾同樂，對香港電車亦「只係牽涉幾百萬蚊」（按：因為車費本身低）——不過佢哋都表明，呢個只係初步構思，亦只係適逢運輸及房屋局長陳帆撥冗出席香港電車獲健力氏世界紀錄頒贈證書嘅時機，向陳局長「表達意願」，睇吓政府有乜諗法或者有乜可以配合，暫時「十劃都未有一撇」。

不過，若果政府接納同批准呢個建議，時間上都會係喺香港奧運代表隊完成東京奧運所有比賽項目，凱旋歸來之後先至實施，屆時香港電車會同全香港市民一齊祝賀。

所以話，唔好聽到少少就講到咁實啦！

做人最緊要公道，其實今次香港電車想搞免費乘車係同以往嘅免費乘車日唔同：

至於話香港電車「包底」得唔得？要當局信係「包底」而唔係自行調整車費囉！穩陣啲等吓當局咩意見先！