荃錦車禍要善後 九巴51號暫停

2020年8月13號黃昏5點幾，一架24噸泥頭車沿荃錦公路向錦田行駛，去到近石崗軍營落斜彎位，失控越過對面行車線，撞毁路邊防撞欄，衝落約20米下嘅山坡，繼而向右邊翻側，擱喺草叢，車頭嚴重損毁，65歲姓劉男司機被困車廂。

消防救護接報到場，先固定泥頭車，用工具小心翼翼撬開車廂，由擋風玻璃位置救出仍有知覺但被困嘅司機，救護員即場為佢作初步治理，再由消防員合力用抬牀運返上荃錦公路路邊，交由救護車送院治理，前後歷時約兩句鐘。

事發翌日嘅8月14號，當局安排吊臂車將涉事泥頭車吊走，因此由中午12:45開始，荃錦公路介乎林錦公路與扶輪公園之間全線封閉。

九巴51號路線自11:20由如心廣場巴士總站開出後會暫停服務，如果吊運工作順利，預計九巴51號路線可以喺16:20開始恢復服務。